Ədliyyə orqanlarına işə qəbul elan edilib

 

544

Tələbə Qəbulu üzrə Dövlət Kоmissiyаsı (TQDK) Ədliyyə Nazirliyi ilə birlikdə noyabrın 16-da Ədliyyə orqanlarında işləmək istəyən namizədlər üçün test imtahanı keçirəcəkdir.
Tələbə Qəbulu üzrə Dövlət Komissiyasından AzərTAc-a bildirmişlər ki, imtahan saat 10.00-da bütün namizədlər üçün vahid auditoriyada – Azərbaycan Texniki Universitetinin idman sarayında, Bakı şəhəri, A.Sultanova küçəsi 5 ünvanında keçiriləcəkdir.
Sənədlərin qəbulu Azərbaycan Respublikası Ədliyyə Nazirliyi tərəfindən cari ilin avqustunda başlanmış və noyabrın 12-də başa çatdırılmışdır. İmtahanda iştirak etmək üçün 350 nəfərin namizədliyi qeydə alınmışdır.
İmtahana gələrkən namizədlər buraxılış vərəqəsini və şəxsiyyət vəsiqəsini mütləq gətirməlidirlər. Göstərilən sənədlərdən biri olmadıqda namizəd imtahana buraxılmayacaqdır. Namizədlər “İmtahana buraxılış vərəqəsi”ni noyabrın 14-dən etibarən saat 9.00-dan 18.00-dək şəxsiyyət vəsiqəsini təqdim etməklə Ədliyyə Nazirliyinin inzibati binasında götürməlidirlər. Buraxılış rejiminin və yerləşdirilmənin təmin olunması üçün namizədlər imtahana gecikmədən, buraxılış vərəqəsində göstərilən vaxtda gəlməlidirlər.
Test imtahanı və müsahibə mərhələsində sualların hazırlanmasında istifadə olunan normativ hüquqi aktlara dair xülasə və “Yaddaş kitabçası” nazirliyin internet səhifəsində yerləşdirilmişdir.
İmtahan 3 saat davam edir və nаmizədlərə 100 suаldаn ibаrət suаl kitаbçаsı təqdim оlunur: 80 suаl namizədin hüquq və qanunvericilik sahəsi üzrə biliyini yoxlayır (suallar Ədliyyə Nazirliyi tərəfindən hazırlanıb); 20 suаl isə nаmizədlərin məntiqi nəticə çıxarma qabiliyyətini müəyyən edir (suallar TQDK tərəfindən hazırlanıb).
Namizədlərin balları hesablandıqda hüquq və qanunvericilik sahəsinə aid test tapşırıqları üzrə hər düzgün cavab 1 bal, məntiqi nəticə çıxarma qabiliyyətini müəyyən edən test tapşırıqları üzrə hər düzgün cavab 0.5 bаllа qiymətləndirilir.
Toplanması mümkün olan maksimal bal 90-a bərabərdir. Nəticələr hesablandıqda yanlış cavablar düz cavabların nəticəsinə təsir göstərmir.
Test imtahanının yekununa görə 55 və daha artıq bal toplamış namizədlər uğur qazanmış hesab olunur. Həmin namizədlərin digər sənədlərinin toplanması və yoxlanılması bu mərhələdən sonra həyata keçiriləcək və qanunvericiliklə müəyyən edilmiş tələblərə cavab verən şəxslər ikinci mərhələyə – müsahibəyə buraxılacaqlar.

 


Comments are closed.