Avropa Mərkəzi Bankının (ECB) ötən gün keçirilmiş növbəti iclasında uçot dərəcəsi gözlənildiyi kimi, dəyişdirilmədi və 0% səviyyəsində saxlanıldı. Qurum həmçinin depozit faizlərini – 0,4% səviyyəsində, marjinal borcvermə faizini isə 0,25% səviyyəsində təsdiqlədi.
XALQ.AZ “Report”a istinadən məlumat verir ki, analitik qrupun araşdırmalarına görə, ECB 2019-ci ilin yayından sonra uçot dərəcəsini sabit saxlamağı, inflyasiya ilə bağlı müəyyən edilmiş minimal həddi təmin etmək üçün ortamüddətli dövrdə faiz dərəcəsini 2%-ə çatdıracağı gözlənilir.
Bununla belə, hələ ki, Avropada faizlər sabitdir. ECB-dən fərqli olaraq ABŞ-ın Federal Ehtiyat Sistemi (FED) uçot dərəcəsini artırmaqda davam edir. Xatırladaq ki, qurumun Açıq Bazar Əməliyyatları Komitəsinin sentyabrın 25-26-da keçirilmiş iclasında uçot dərəcəsinin 0,25 faiz bəndi artırılaraq 1,75-2%-dən 2-2,25%-ə çatdırılmasına qərar verilib. Bu ilin dekabr ayında növbəti faiz artımının baş tutacağı bildirilir.
“Report”un analitik qrupu hesab edir ki, ECB-nin faizləri sabit saxlaması, FED-in isə artırması fonunda bu ilin sonuna qədər 1 avro 1-1,1 dollara qədər ucuzlaşa bilər.
Xatırladaq ki, USD/EUR nisbəti 2018-ci ilə 1,2 səviyyəsi ilə başlayıb. İl ərzində bu nisbət 1,25-ə qədər artsa da, hazırda 1,13-1,14 civarındadır.
// XALQ.AZ
