“Azərbaycan Sənaye Korporasiyası” ASC-nin törəmə müəssisəsi olan “Azərtütün ASK” MMC 2019-cu il mövsümündə Şəki, Qax, Zaqatala və Balakən rayonlarında 1800 hektar sahədə “Virciniya botaniki” növündən olan yaşıl tütünün istehsalı və tədarükü üzrə 229 fermerlə (istehsalçı) müqavilələr bağlayıb.
ASC-dən bildirilib ki, müqavilə şərtlərinə görə tədarük edilən 1 kiloqram yaşıl tütün məhsulu üzrə 1-ci sort tütün – 0,25 AZN/kiloqram, 2-ci sort – 0,17 AZN və 3-cü sort – 0,10 AZN nəzərdə tutulub. Bununla yanaşı, fermerlərin dəstəklənməsi üçün “Azərtütün ASK” MMC tütün istehsalçıları ilə sıx əməkdaşlıq şəraitində fəaliyyət göstərir və bütün istiqamətlər üzrə mümkün olan dəstək tədbirləri təmin edilir.
Belə ki, fermerlərin toxum və gübrə tələbatı təmin edilib, “ASK” ASC-nin zəmanəti ilə hər hektar üçün 1700 AZN olmaqla 181 fermerə kredit xətləri açılıb. Eyni zamanda, aqrotexniki tədbirlərin görülməsinə ASC-nin mövcud texniki resursları cəlb edilib, mütəxəssislər tərəfindən tütünün əkilməsi və becərilməsi sahəsində istehsalçılara zəruri dəstək göstərilib, aqrotexniki qaydalara riayət edilməsi məsələləri nəzarətdə saxlanılıb, fermerlərə təlimlər keçirilib, yerindəcə lazımi metodiki məsləhətlər verilib, həmçinin tütünün müasir tələblərə uyğun becərilməsinə dair təlimatlar hazırlanaraq onlara təqdim edilib.
Keçirilən görüşlər zamanı məhsul istehsalı ilə əlaqədar fermerlərə verilən güzəştli kreditlərin müddətinin uzadılması, tütün istehsalçılarına verilən subsidiyaların məbləğinin artırılması, həmçinin toxum, texnika və su təminatının yaxşılaşdırılması, xüsusilə də yaşıl tütünün alış qiymətinin artırılması xahiş olunub.
Qeyd olunanları nəzərə alaraq, 2019-cu ilin istehsal mövsümündə keyfiyyətli tütün tədarükünün stimullaşdırılması və tütün əkinlərinə marağın artırılması məqsədilə “Azərtütün ASK” MMC tərəfindən cari ildə yaşıl tütünün tədarük qiymətlərinin müvafiq olaraq 1-ci sort – 1 kiloqram – 0,27 AZN; 2-ci sort – 1 kiloqram – 0,18 AZN həddində müəyyən edilməsi məqsədəuyğun hesab edilib. Yaşıl tütünün alış qiymətlərinin artırılmasına Kənd Təsərrüfatı Nazirliyi tərəfindən müsbət rəy bildirilib.
