“Biz imitasiya naminə danışıqlarda iştirak etməyəcəyik” – Deputat

tamam ceferova 130420

“Sülh və diplomatik üsullara sadiq olan Azərbaycan öz hərbi gücünü tanıyır və müharibə ehtimalını inkar etmir. Azərbaycan hərbi ritorikaya çağırmır, Azərbaycan hərbi əməliyyatlar vasitəsilə işğal olunmuş ərazilərinin adekvat vasitələr ilə qaytarılmasına hazır olduğunu bəyan edir. Beynəlxalq ictimaiyyət bilməlidir ki, bu sözlər hərbi ritorikanın təzahürü deyil. Bu sözlər tarixi ədalətin bərpasına dair bir çağırışdır.  Ermənistan rəhbərinin danışıqlar prosesini “ faktiki olaraq pozması”  artıq Ermənistana inamın olmadığını açıq şəkildə nümayiş etdirir. Danışıqlar faktiki olaraq getmir. Cənab Prezidentin qeyd etdiyi kimi, “Biz imitasiya naminə danışıqlarda iştirak etməyəcəyik. O demək deyil ki, biz danışıqlardan imtina edirik, biz Ermənistanın özünə görə bic siyasətinə qoşulmaq istəmirik. Bu görüntü naminə aparılan danışıqlarda iştirakımız o görüntünün mahiyyətinə uyğun olacaqdır”.

Sentyabrın 19-da Heydər Əliyev adına Bakı dərin özüllər zavodunda “Abşeron” yatağının dəniz əməliyyatlarının təməlqoyma tədbirindən sonra Prezident İlham Əliyevin Azərbaycan Televiziyasına, İctimai Televiziyaya və Real Televiziyasına müsahibəsini XALQ.AZ-a şərh edən Milli Məclisin deputatı Tamam Cəfərova belə deyib.

Tamam Cəfərova qeyd edib ki, danışıqların hazırkı vəziyyətini mənfi qiymətləndirən cənab Prezident  Azərbaycan xalqının onunla tam razı olduğunu xüsusilə vurğuladı və bildirdi ki, o, hər zaman bütün dövrlərdə Azərbaycan xalqına həqiqəti deyib və hesab edib ki, bu, yeganə düzgün siyasətdir. Xalq bilməlidir nələr baş verir, hansı yerdəyik, nədir bizim siyasətimiz, düzgün təhlil aparmaq üçün onlar düzgün məlumat əldə etməlidirlər.  Vətəndaşların yaşından asılı olmayaraq könüllü hərbi xidmətə getmək üçün kütləvi şəkildə hərbi komissarlıqlara müraciətləri vətəndaşlarımızın ÖZ PREZİDENTİ ilə  tam razı olduqlarının bariz nümunəsidir. Tovuz təxribatı zamanı Azərbaycanın müstəqillik tarixində ilk dəfə olaraq ölkədə fəaliyyət göstərən 43 siyasi partiyanın birgə, 4 siyasi partiyanın isə ayrılıqda Ali Baş Komandanın ətrafında birləşməsi bəyanatı ölkədə sağlam iqtidar-müxalifət münasibətlərinin formalaşmasının təzahürüdür. 

Deputat bildirib ki, cənab Prezidentin “Özümüz-özümüzü aldatmamalıyıq, xalqımızı aldatmamalıyıq. Danışıqlar getmir və bu, pandemiyaya görə baş vermir.   Ermənistan baş nazirinin  “Qarabağ Ermənistandır” ifadəsi danışıqlar prosesini mənasız edir” fikri beynəlxalq ictimaiyyəti düşündürməlidir. Belə ki, Ermənistan baş nazirinin səsləndirdiyi cəfəng fikirlər danışıqlar prosesinə ciddi zərbə vurdu:  “Qarabağ Ermənistandır” deməklə nəinki o yalanı bütün dünyaya yaydı və bu da davam edir, eyni zamanda, danışıqlar prosesini mənasız edir. Əgər o hesab edir ki, Qarabağ Ermənistandır, onda nə barədə danışmaq olar? Əgər o, belə hesab edir ki, Qarabağ Ermənistandır, – halbuki bütün dünya bu cəfəng fikri rədd edib, – onda hansı sülh müqaviləsindən söhbət gedə bilər. Yəni, bu, siyasi təxribat idi. İkinci siyasi təxribat o idi ki, Azərbaycan Ermənistanla yox, Dağlıq Qarabağla danışıqlar aparmalıdır. Bu da formatı dəyişdirmək deməkdir və buna əlbəttə ki, biz heç vaxt razı ola bilmərik. Çünki bu oyuncaq kriminal xunta rejimi ilə heç bir təmaslarımız ola bilməz”- bu fikirlər Prezident İlham Əliyevə məxsusdur.

Cənab Prezident beynəlxalq ictimaiyyətə qəti mövqeyimizi bəyan edərək bildirdi ki, “Biz öz mövqeyimizdə dayanmışıq”. Azərbaycan Ermənistanın baş nazirinin  cəfəng şərtlərini rədd edir və cəmi bir şərt irəli sürür: “Onlar bizim torpaqlarımızdan qeyd-şərtsiz və tam çıxmalıdırlar, necə ki, bu, BMT Təhlükəsizlik Şurasının qətnamələrində öz əksini tapır”.

“Əgər onlar beynəlxalq hüququ yerə vururlarsa, biz niyə beynəlxalq hüququ gözləməliyik, biz də yerə vuracağıq, amma axırı pis olacaq onlar üçün,” Cənab Prezidentin beynəlxalq ictimaiyyətə bu mesajını  güc üstünlüyü, hüquq üstünlüyü, tarixi üstünlük, hərbi üstünlük Azərbaycanın tərəfində olduğu halda sonsuz səbrin nümayişinin mümkünsüzlüyü kimi qəbul etmək olar.