“Rusiyanın vasitəçiliyi ilə paytaxt Moskvada keçirilən üçtərəfli danışıqlar atəşkəslə nəticələndi. Bunun erməni tərəfi üçün heç bir hüquq norması yoxdur. Sadəcə olaraq Azərbaycan tərəfi dünya ictimaiyyətində ermənilərin təbliğ etdiyi kimi “qıran, dağıdan, məhv edən” bir dövlət obrazından, beynəlxalq hüquq normalarına riayət edən bir dövlət imicinə addım atıb”.
XALQ.AZ xəbər verir ki, bu sözləri açıqlamasında Milli Məclisin vitse-spikeri Fəzail İbrahimli söyləyib. O qeyd edib ki, ölkə başçısının qətiyyətlə bəyan etdiyi kimi məsələlər qrafik üzrə həll olunmalıdır:
“Ümumiyyətlə, Qarabağ məsələsinin həllinə qısaca nəzər salsaq, üç əsas mərhələdən keçir. Uzun illər öncə ulu öndər Heydər Əliyev Qarabağ problemi ilə bağlı görüşmələrində çubuq götürüb, xəritədən istifadə edərək dünyaya Dağlıq Qarabağın harda yerləşdiyini sübut edirdi. Birinci mərhələdə biz dünyaya anlatdıq ki, Dağlıq Qarabağ Azərbaycanın ərazisində yerləşir. Bundan sonra isə dünya dövlətlərinin, təşkilatlarının razılığını aldıq ki, bu məsələ Azərbaycanın ərazi bütövlüyü çərçivəsində həll olunmalıdır. Beynəlxalq hüquq normalarına riayət etməklə, ATƏT-in Minsk qrupunun münasibətini axıra qədər səbrlə izlədik. Ermənistanda zorla çeviriliş yoluyla hakimiyyətə gələn Paşinyandan sonra, danışıqlara, məsələnin müzakirələr və sülh yoluyla həll edilməsinə olan ümidlər yox oldu. Biz bilirdik ki, Minsk qrupunun üzvləri oyun oynayır. Ermənistan Minsk qrupunun üzvü olan Rusiyanın forfostudur. Digər həmsədr dövlət olan Fransa isə elan edib ki, Ermənistan bizim bacımızdır. Onlar dəfələrlə atəşkəsi, təmas xəttini pozdular. Nəhayət, cənab prezident bəyan etdi ki, baş verənlər Ermənistanın günahıdır. Sonra isə,bütün dünyaya bu problemin həllinin sülh yox yalnız müharibə ilə həllinin mümkünlüyü və Azərbaycanın öz torpaqlarını azad etmək iqtidarında olduğunu sübut etdi. Sadəcə insan itkisinə yol verməmək üçün biz həmişə müharibədən uzaq durmuşuq. İllər ərzində dəfələrlə onlar tərəfindən atəşkəs pozulduğu, şəhidlərimizin olduğu vəziyyətdə səbrlə vəziyyətin düzəlməsini gözlədik. Amma artıq “qananı sözlə, qanmayanı güclə” prinsipinə əməl etməyin vaxtı gəldi”.
Fəzail İbrahimlinin sözlərinə görə, 30 ildir Minsk qrupunun bizə aşıladığı “danışıq” arqumenti yalan oldu:
“Nikol Paşinyan kimi psixoloji vəziyyəti yaxşı olmayan, qərəzli münasibət bəsləyən, Şuşada rəqs edib parlamenti ora köçürməyə cəhd edən bir insanla necə danışmaq olar? Bütün bunlar bizim səbr kasamızı doldurdu. Minsk qrupunun danışıq tövsiyəsini həyata keçirməyə başladıq. Amma danışığın forması bəlli oldu. Onlar anladı ki, Azərbaycan danışığın hər iki formasını bilir. Otuz ildir sülhlə, on gündür ki, hərbi yolla gedirik. Əgər atəşkəs rejimi elan olunmasa idi, biz bir həftə ərzində Xankəndində olacaqdıq. Yenə də hər şey bitməyib. Dünya üstümüzə gəlir, Fransa prezidenti iki dəfə zəng edib, Amerikada narahatlıq var, Rusiya “dodaqlarını dişinə sıxıb” dayanıb. Bu yükü üzərimizdən götürmək üçün bir addım atdıq, Ermənistana sonuncu şansı verdik. Əgər erməni başçı gənclərini məhv etmək istəmirsə, əl çəksin, torpaqlarımızın tərk etsin! Əgər deyilənlərə əməl etməsə, Azərbaycan ordusu, rəhbərliyi və xalqı, beynəlxalq təşkilatlara “siz bacarmadınız, biz torpaqlarımızı azad edəcəyik” deyib, hərəkətə keçəcək. Biz artıq danışıqlarda bizə nə təklif ediləcək yox, biz nə güzəşt edəcəyik düşüncəsi ilə hərəkət edəcəyik. Azərbaycan tərəfini qane etməyən, sərf etməyən heç bir şeyi qəbul etməyəcəyik. Torpaqlarımız işğaldan azad olunmalıdır, bu cənab prezidentin dediyi qətiyyətli ifadədir. Görək, cavabdehliyi öz üstünə götürən Moskva nə addım atacaq?! Qısa zamanda bizə hamısı məlum olacaq. Ona görə də hesab edirəm ki, əgər atəşkəsə riayət olunacaq və bizim irəli sürdüyümüz şərtlərə əməl edilib torpaqlarımız azad olunacaqsa, təbii ki, qan tökməyin əleyhinəyik. Hər nə qədər vətən sevgisi olsada, övladının şəhid olması ürəyini dağlayan analar, ailələr üçün bu doğru bir addım olar”.
Vitse-spiker onu da diqqətə çatdırıb ki, artıq bir neçə saatdır, elan olunasa da faktiki atəşkəs yoxdur, ermənilər atəş açmağa davam edirlər:
“Humanitar addımlar çərçivəsində ermənilərə gözlədiklərindən dəfələlə çox meyit gedəcək. Onsuz da, artıq Ermənistan hərbi və siyasi dairələrinin siyasi böhranı başlayıb. Dağlarda yiyəsiz qalmış meyitlər daşınanda mənə elə gəlir ki, Paşinyanın bir cavabı olacaq. Necə gəlib, elə də qayıdacaq. Erməni xalqı başa düşdü ki, Paşinyan xalqı bədbəxt etməyə gəlib. O, hakimiyyətə gələndə Qarabağ əhalisini xalqa ögey yanaşdığı üçün qınayırdı. Amma indi məlum oldu ki, bundan əvvəlki liderlər belə Nikol Paşinyandan daha ağıllı imiş. Mən əminəm ki, yaxın zamanda onun iç üzü açılacaq, xalq onu hakimiyyətdən salacaq.
Son olaraq, Tanrıdan ən böyük arzum budur ki, analarımızın göz yaşı axmasın, işğal olunmuş torpaqlarımız bu atəşkəs rejimi vasitəsilə tam azad olunsun. Şuşada bayrağımız dalğalansın və qələbə müjdəsi ilə yenidən müsahibə verim”.
