Millət vəkili bayramı əsgərlərlə qeyd etdi

08

 

Millət vəkili Qənirə Paşayeva Qurban Bayramı münasibətilə Tovuz rayonunda, Ermənistanla ön cəbhədə yerləşən “N” saylı hərbi hissədə əsgərlərlə görüş keçirib. Xal.az-ın məlumatına görə, əsgər və zabitlər qarşısında çıxış edən millət vəkili Qənirə Paşayeva onları Qurban Bayramı münasibətilə təbrik edib. Qurban bayramının hikmətlərindən danışan millət vəkili hər bir hərbçiyə dualarına çatmalarını diləyib. Qənirə Paşayeva deyib ki, hər bir azərbaycanlının ən böyük arzusu Ermənistanın işğalı altında olan torpaqlarımızın işğaldan azad olunması və bayrağımızın Dağlıq Qarabağımızda da dalğalanmasıdır: “Bunun üçün biz hər birimiz üzərimizə düşən vəzifələri layiqincə yerinə yetirməliyik. Mən inanıram ki, o gün uzaqda deyil və biz Ali Baş Komandanın rəhbərliyi altında torpaqlarımızı işğaldan azad edəcəyik. Bayrağımız o gözəl torpaqlarımızda da dalğalanacaq”.

Tovuz rayon İcra Hakimiyyətinin başçısı Tofiq Zeynalov da əsgər və zabitləri bayram münasibəti ilə təbrik edib. Daha sonra Qurban Bayramı münasibətilə hərbi hissədə qurban kəsilib.

Daha sonra xidmətdə fərqlənən əsgər və zabitlərə hədiyyələr,  millət vəkili Qənirə Paşayevanın müəllifi olduğu kitablar təqdim edilib.

Sonra hərbi hissənin rəhbəri, polkovnik Mais Bərxudarov çıxış edib. Belə görüşlərin əsgərlər üçün mənəvi dəstək rolu oynadığını, onlarda ruh yüksəkliyi yaratdığını deyib. Millət vəkili Qənirə Paşayeva və digər qonaqlar əsgər və zabitlər ilə birlikdə nahar ediblər.

Qeyd edək ki, sonda tədbir konsert proqramı ilə davam edib.

 

09