Prezident: “Axıra qədər gedəcəyik, sonacan gedəcəyik”

“Biz yolumuzu davam edəcəyik. Atəşkəs istəyirlərsə, desinlər işğalçı dövlətə rədd olsun çıxsın. Yox? Axıra qədər gedəcəyik, sonacan gedəcəyik. Düşməni bundan sonra da qovacağıq, necə ki qovuruq. Necə ki qaçır bizim qabağımızdan və qaçacaq. Çünki biz haqlıyıq və biz güclüyük”.

XALQ.AZ  xəbər verir ki, bunu Azərbaycan Prezidenti İlham Əliyev xalqa müraciətində deyib.

“Biz döyüş meydanında tarixi ədaləti bərpa edirik. Dağlıq Qarabağ tarixi Azərbaycan torpağıdır. Əsrlər boyu Azərbaycan bu torpaqlarda yaşayıb, qurub. Qarabağ tarixini yaxşı bilirik və dünya ictimayyətinə çatdırılması üçün son illər ərzində böyük işlər görülüb. 90-cı illərin əvvəlində Azərbaycan haqqında dünyada o qədər böyük təsəvvür yox idi”.

Prezidentin sözlərinə görə, bir çox ölkələrdə fəaliyyət göstərən erməni lobbi təşkilatları həm bölgənin tarixi, həm də münaqişənin tarixi ilə bağlı yanlış məlumat ötürərək, dünyanın ictimai fikrində təhrif edilmiş təsəvvür yarada biliblər:

“Məhz buna görə torpaqlarımız işğal altına düşə-düşə bizə qarşı sanksiyalar tətbiq edilib. Bu sanksiyalar bu günədək də qüvvədədir. Müstəqilliyimizin ilk mərhələsində ABŞ Konqresi Azərbaycana qarşı sanksiya tətbiq edib.

Guya Azərbaycan Ermənistana qarşı təcavüz edir. Təsəvvür edin, bu sanksiyalar bu günədək qüvvədədir. O vaxt Azərbaycan diplomatiyası erməni yalanının qarşısına heç bir arqument gətirə bilməmişdi”.

İ.Əliyev qeyd edib ki, son illər ərzində ardıcıl fəaliyyət nəticəsində biz dünya ictimaiyyətini Qarabağın, münaqişənin tarixi ilə bağlı kifayət qədər məlumatlandırmışıq:

“Bütün bu görülən işlər bu gün bizə kömək göstərir. Artıq dünyada bu məsələ ilə bağlı da obyektiv fikir var. Biz buna yorulmaz səylərimiz nəticəsində nail olmuşuq. Mən deyəndə ki tarixi ədaləti bərpa edirik. Mən haqlıyam”.