Özlərini “ASAN xidmət” mərkəzinin əməkdaşları kimi təqdim edərək korrupsiya cinayəti törətmiş şəxslər barəsində Baş prokuror yanında Korrupsiyaya qarşı Mübarizə Baş İdarəsində istintaq edilən cinayət işləri üzrə məhkəmələr tərəfindən müvafiq ittiham hökmləri çıxarılmışdır.
XALQ.AZ xəbər verir ki, Baş Prokurorluğun mətbuat xidmətindən Trend-ə verilən məlumata görə, Salyan, Saatlı, Bərdə və Şəki rayon sakinlərinin “Daşınmaz Əmlakın Qiymətləndirilməsi” MMC-nin Bərdə rayonu üzrə mütəxəssisi Vüsal Baxşəliyevin özünü “ASAN xidmət” mərkəzinin əməkdaşı kimi təqdim edərək yaşayış evlərinə dair mülkiyyət hüququ verilməsi haqqında qeydiyyat şəhadətnaməsinin verilməsi müqabilində onlardan müxtəlif məbləğlərdə pul alması barədə müraciətləri üzrə Baş prokuror yanında Korrupsiyaya qarşı Mübarizə Baş İdarəsində cinayət işi başlanaraq istintaqı aparılmışdır.
İstintaqla müəyyən edilmişdir ki, V.Baxşəliyev cəmiyyətin nizamnaməsində nəzərdə tutulmuş qanuni fəaliyyətdən kənara çıxaraq, öz qulluq mövqeyindən istifadə edib özgənin əmlakını aldatma yolu ilə ələ keçirmə məqsədilə özünü “ASAN xidmət” mərkəzinin əməkdaşı kimi təqdim edərək 2014-cü ilin fevral ayında 19 nəfər Bərdə rayon sakinindən ümumilikdə 420 manat pulu ələ keçirərək dələduzluq etmiş, xidməti səlahiyyətlərinin hüdudlarından açıq-aşkar surətdə kənara çıxıb “ASAN xidmət” mərkəzinin fəaliyyətini nüfuzdan salan, korrupsiyaya qarşı mübarizə sahəsində görülən işlərə ləkə gətirən həmin hərəkətləri ilə vətəndaşların və dövlətin qanunla qorunan mənafelərinə mühüm zərər vurmuşdur.
V.Baxşəliyev Cinayət Məcəlləsinin 178.2.3, 309.1 və 313-cü maddələri ilə təqsirli bilinərək Bərdə rayon məhkəməsi tərəfindən barəsində müvafiq ittiham hökmü çıxarılmışdır.
Digər cinayət işi Baş prokuror yanında Korrupsiyaya qarşı Mübarizə Baş İdarəsində “SF Qiymətləndirmə” MMC, “Kamal-SF” MMC-nin “Daşınmaz Əmlakın Qiymətləndirilməsi” MMC və “Qiymətləndirmə Xidməti” MMC-nin vəzifəli şəxsləri tərəfindən vəzifə səlahiyyətlərindən sui-istifadə edilərək fiziki şəxslərin hüquqlarına və dövlətin qanunla qorunan mənafelərinə mühüm zərər vurma və qabaqcadan əlbir olan bir qrup şəxs tərəfindən dələduzluq yolu ilə özgə əmlakının ələ keçirilməsi faktlarına görə başlanmışdır. Həmin cinayət işinin materiallarından “Daşınmaz Əmlakın Qiymətləndirilməsi” MMC-nin qiymətləndirici mütəxəssisi Hüseyn Abdullayevin barəsində cinayət işi ayrılaraq istintaqı aparılmışdır.
İstintaqla müəyyən edilmişdir ki, H.Abdullayev cəmiyyətin nizamnaməsində nəzərdə tutulmuş qanuni fəaliyyətdən açıq-aşkar surətdə kənara çıxaraq, öz səlahiyyətləri dairəsinə daxil olmayan hərəkətlər etməklə, yəni vəzifə səlahiyyətlərini aşaraq 2014-cü ilin fevral ayında Saatlı şəhər sakinlərinə özünü “ASAN xidmət” mərkəzinin əməkdaşı kimi təqdim edərək, fərdi yaşayış evləri üçün mülkiyyət hüquqlarının dövlət qeydiyyatına dair çıxarışların və texniki pasportların verilməsini, evlərinin qiymətləndirilməsi barədə sənəd verəcəyini bildirib onlardan ümumilikdə 200 manat almaqla korrupsiyaya qarşı mübarizə sahəsində görülən işlərə ləkə gətirən həmin hərəkətləri ilə vətəndaşların və dövlətin qanunla qorunan mənafelərinə mühüm zərər vurmuşdur.
Saatlı rayon məhkəməsinin hökmü ilə H.Abdullayev Cinayət Məcəlləsinin 309.1-ci maddəsi ilə təqsirli bilinərək barəsində müvafiq ittiham hökmü çıxarılmışdır.
