“Biz ona yalnız mühüm bir yol kimi yox, siyasi layihə kimi baxmalıyıq” – Zəngəzur dəhlizi barədə

Hazırda dünya ölkələri müxtəlif marşrutlar əldə etmək üçün qızğın iqtisadi və siyasi mübarizəyə başlayıblar. Çinin müəlifi olduğu “Bir kəmər Bir yol” qlobal marşrutunun ən rahat qollarından biri Azərbaycan ərazisi hesab edilir. Bir çox ölkələrin Azərbaycanın yaratdığı yeni reallıqlardan sonra gerçəkləşdirdiyi Zəngəzur dəhlizinin perspektivlərinə marağı daha da artır. Bu məsələ Xarici işlər naziri Ceyhun Bayramovun Macarıstana səfəri zamanı bir daha səsləndirilib.

Cənubi Qafqazda və bütövlükdə regionda yaranmış yeni geosiyasi reallıqlar zaman keçdikcə öz yerini tapmaqdadır. İndi növbə Azərbaycanın əsas hissəsini onun bir parçası olan Naxçıvanla birləşdirən Zəngəzur dəhlizinin açılmasıdır. Hazırda dünyada gedən iqtisadi yeniliklər və siyasi vəziyyət bunu göstərir ki, Zəngəzurla bağlı məsələ reallaşmalı, sürətlənməli və yaxın vaxtlarda dəhlizin bərpası təmin olunmalıdır.

“Zəngəzur dəhlizinin açılmasında nə qədər iqtisadi əhəmiyyət varsa, bir o qədər də siyasi əhəmiyyət var. Biz ona yalnız mühüm bir yol kimi yox, siyasi bir layihə kimi baxmalıyıq. Çünki bu həm də bizim Türkiyə və orta Asiya Respublikları ilə birliyimizi daha da gücləndirəcək, möhkəmləndirəcək və Türk dövlətləri arasında inteqrasiyanı, birliyi artıracaq”.

Deputatın sözlərinə görə, Zəngəzur dəhlizinin açılması ilə bağlı heç kimin şübhəsi olmasın, dəhliz mütləq açılacaq: “Bu Azərbaycanın prinsipial bir məsələsidir və Azərbaycan bu məsələni mütləq şəkildə həll edəcək. Sadəcə burada zaman məsələsi var. Bundan əlavə Zəngəzur dəhlizi təkcə Azərbaycanı düşündürən, Azərbaycanı maraqlandıran bir məsələ deyil. Eyni zamanda region dövlətlərini ciddi şəkildə maraqlandıran bir layihədir”.

Sadəcə bu məsələ zamanla öz həllini tapacaq. Zaman-zaman müəyyən problemlər ortaya çıxır. Ermənistan təxribatlara əl atır, digər ölkələr buna mane olmağa çalışır, amma Azərbaycan bütün məqsədlərinə birmənalı olaraq nail olacaq – deyə Ceyhun Məmmədov qeyd edib.