“Uşaqların Hərbi Qənimətlər Parkına səfəri çox vacibdir. Pandemiya şəraiti imkan verdikcə mən bütün valideynləri, məktəb rəhbərlərini (Bakıda, rayonlarda) uşaqları bu parka ziyarətə aparmağa çağırıram!”
XALQ.AZ xəbər verir ki, bu çağırışla Milli Məclisin deputatı Tahir Mirkişili çıxış edib.
Deputat hesab edir ki, məhz uşaqların şüurunda bu möhtəşəm qələbə əbədi olaraq həkk olunmalı, özlərini güclü saymalıdırlar:
“Bu gün və gələcəkdə biz daim güclü olmalıyıq. Hər mənada. Bu qələbəni nəticələrini görən uşaqları böyüyəndə daha da böyük uğurlara imza atacaqlar. Bütün sahələrdə. Əks halda yaşamaq şansımız belə olmayacaq…”
Tahir Mirkişili Yaponiyaya səfər təəssüratlarını da bölüşüb.
“Biz Yaponiyada səfərdə olarkən Robotlar muzeyini ziyarət etmişdik. Bu çox müasir, texnoloji və mürəkkəb bir muzeydə ən çox diqqətimizi çəkən muzeydə xeyli sayda 5-8 yaşında uşaqların olması idi. Yaponlar yaşlı nəslin uğurlarını kiçik uşaqlara ona görə göstərirlər ki, onlar üçün bu texnologiyalar indidən əlçatan olsun və onlar böyüyəndə bundan da yaxşılarını yaratsınlar…”, – deyə deputat bildirib.
