Ölkədə 9 şəhid – Restoranlarda çal oynasın, vur çatlasın
Bu gün yaralı yerimiz Qarabağdan, cəbhə bölgəsindən acı xəbər aldıq. 9 əsgərimiz vətənimizin bütövlüyü uğrunda şəhid oldu. Çox təssüf ki, əsas vəzifəsi cəmiyyəti bilgiləndirmək olan televiziya kanallarımız, əyləndirmək prinsiplərini əsas tutaraq, efirlərində konsert, əyləncəli verilişlər verməkdə davam etdilər.
Bəs hər küncündə-bucağında restoran, şadlıq evi olan paytaxtımızda, restoranlarımız necə, şəhidlərimizin ruhuna hörmətlə yanaşacaqlarmı? Restoran sahibləri öz vətəndaşlıq borclarını yerinə yetirəcəklərmi? Yoxsa qazanc önəmlidir? Maraqlandıq və yenə də məyus olduq.
Paytaxtın bir neçə məşhur restoranlarına zəng edib maraqlandıq, amma heç də şəhid vermiş bir ölkənin gündəminə uyğun abu-hava hiss etmədik, hər şey öz axarı ilə davam edir. Restoranlar bu gün axşam paytaxt sakinlərini və şəhərimizin qonaqlarını öz şou proqramlarına dəvət etməkdə davam edirlər.
Axşam şou proqram təşkil edəcək retsoranlarımız bunlardır, bəlkə getmək istəyən olar:
Altun restoranı
Lido restoranı
Niaqara restoranı
Ay İşığı restoranı
Oazis restoranı
Çanaqqala restoranı
Neolit restoranı
Uzağa getməyək, elə qonşu Türkiyədə bütün siyasi, sosial məsələrin önündə müğənnilər, şou-biznes nümayəndələri gedirlər, vətəndaşlıq borclarını layiqincə yerinə yetirirlər. Türkiyədə şəhid xəbəri çıxan kimi, bütün müğənnilər konsert proqramlarını təxirə salır, sosial şəbəkələrdə Türkiyənin böyüklüyünü nümayiş etdirən yazılarla çıxış edirlər. Bəs bu gün bizim sənətçi dediklərimiz nə edirlər?! Axı, bu gün 9 şəhid vermişik, 9 vətən övladı itirmişik. Bizim şou əhlimiz isə pul qazanmağından geri qalmır.
Bu axşam şou proqramlarında çıxış edəcək adlarını öyrənə bildiyimiz şou- biznes nümayəndələri:
Səməd Səmədov
Xatun
Sevil-Sevinc bacıları
Samira
Niyam
İzzət
Dostlar qrupu
Avqustun 2-də “Panoramic Restaurant & Music Hall” Türkiyəli mügənni Doğuş konsert proqramı ilə çıxış edəcək.
Qeyd edək ki, ölkənin heç bir şadlıq sarayında toylar təxirə salınmayıb.
Lakin son saatlarda Amburan Beach Club “SEREBRO” qrupunun avqustun 2-də istirahət mərkəzində baş tutacaq konsertini təxirə salınıb.
Unutmayaq ki, necə insan olmaq yalnız şəxsin özünü, necə vətəndaş olmaq isə, bütün cəmiyyəti, milləti, dövləti maraqlaqlandıran məsələdir.