Milli Məclisin Sədri Sahibə Qafarova Pakistan İslam Respublikasına rəsmi səfəri çərçivəsində Azərbaycanın bu ölkədəki səfirliyində olub.
Bu barədə XALQ.AZ-a Milli Məclisin mətbuat xidmətindən məlumat verilib.
Bildirilib ki, Milli Məclisin Sədri burada Ulu öndər Heydər Əliyevin büstü önünə gül dəstələri qoyub.
Sonra parlamentin Sədri və nümayəndə heyətinin üzvləri səfirlik əməkdaşları ilə tanış olaraq onlar üçün burada yaradılmış şəraitlə yaxından maraqlanıblar.
Milli Məclisin Sədri səfirlikdəki xatirə kitabına öz ürək sözlərini yazıb.
