Mosulda Türkiyə konsulluğuna İŞİD silahlıları tərəfindən edilən basqının görüntüləri yayılıb.
XALQ.AZ-ın məlumatına görə, Görüntülərdə türk dilində danışan bir nəfər özünü İŞİD-in komandirilərindən biri kimi təqdim edib.
Şəxsiyyəti məlum olmayan həmin şəxs videoda cihada çağrışı edib.
Mobil telefon ilə çəkilmiş videoda çıxış edən həmin şəxs çox vaxt yuxusuz və acqarına döyüşdüklərini söyləyib:
“Bütün kafirlər bu torpaqlardan yox olacaqlar”.
Xatırladaq ki, İraq hökuməti Mosul şəhərində yaşanan gərginliklə əlaqədar ölkədə fövqəladə vəziyyət elan edib. Mosul şəhərində İraq-Şam İslam Dövləti silahlıları ilə hökumət qüvvələri arasında başlayan qarşıdurmalar geniş vüsət alıb. İŞİD silahlıları Mosul şəhərində rəhbərliyi tamamilə ələ keçirdiklərini bəyan ediblər.
Ölkənin baş naziri Nuri əl-Maliki fövqəladə vəziyyətlə əlaqədar səfərbərlik elan edib. Maliki həmçinin Birləşmiş Millətlər Təşkilatı və Ərəb Liqasından terrorizmə qarşı mübarizədə dəstək gözlədiyini bildirib.