Oğlan tərəfi rəsmi nikah təklifindən imtina edib.
Həyat yoldaşı və qayınanası tərəfindən küçəyə atılan qadının evdən qovulmasına səbəb hamilə olması olub.
Xalq.az AzNews.Az-a istinadən xəbər verir ki, kömək üçün “Təmiz dünya” İctimai Birliyinə müraciət edən qadın 3 aylıq hamilə olduğunu, ərinin, eləcə də ərinin ailəsinin bu xəbəri eşitdikdən sonra onu küçəyə atdığını bildirib.
“Araşdırma zamanı məlum olub ki, bu ilin yayında ailə quran M.Z -ya rəsmi nikah bağlanmayıb. Qızın özü və ailəsinin tələblərinə baxmayaraq, oğlan tərəfi rəsmi nikah təklifindən imtina edib. Bu günlərdə isə gəlinin 3 aylıq hamilə olduğunu bilib evə buraxmayıblar.
Qadın adi qaydada anasıgilə gedib və bundan sonra əri ona zəng edərək bir daha evə qayıtmamasını istəyib. Evə getdikdə isə onu artıq evə buraxmayblar”, – deyə təşkilatdan bildirilib.
Hazırda gənc qadına hüquqi yardımla bağlı iş aparılır.
