Azərbaycan Respublikasının Prezidenti yanında Gənclər Fondunun maliyyə dəstəyi ilə “İslahatçı Gənclər” İctimai Birliyi tərəfindən “Sosial Media Məktəbi” layihəsinin açılış mərasimi keçirilib.
“Sosial Media Məktəbi” layihəsinin açılış mərasimində YAP Gəncə şəhər Təşkilatının sədri Naqif Həmzəyev, şəhər Gənclər və İdman Baş İdarəsinin rəisi Müşviq Cəfərov, Gəncə şəhər İcra Hakimiyyətinin nümayəndəsi Kənan Məmmədov, təlimçilər və gənclər iştirak edib.
XALQ.AZ-a verilən məlumata görə, Gəncə şəhərində 13-14 fevral tarixlərində baş tutacaq təlimlərə 400-ə yaxın gənc qatılıb. İki gündə 4 təlimin keçiriləcəyi media layihəsinin məqsədi gənclərə yeni media bilikləri aşılamaq, onun bütün üstünlükləri barədə onlara bilik və bacarıqlar, sosial mediadan effektiv istifadə qaydaları öyrətmək, bununla yanaşı gənclərin sosial media sahəsində inkişafına töhfə verməkdir.
Tədbiri giriş sözü ilə açan YAP Gəncə şəhər Təşkilatının sədri, millət vəkili Naqif Həmzəyev bildirib ki, Azərbaycan gəncliyinin böyük imkanları mövcuddur. İndi əsas vəzifə gənclərin bu imkanlardan layiqincə yararlanaraq, həm öz inkişafını təmin etməsi, həm də dövlətimizin mənafeyini etibarlı şəkildə müdafiə etməsi üçün ciddi iradə ilə çalışır.
“İslahatçı Gənclər” İctimai Birliyinin sədri Fərid Şahbazlı qeyd edib ki, müasir dövrdə sosial medianın önəmi günü-gündən artır. Fərid Şahbazlı xüsusilə Xocalı soyqırımının tanıdılmasında, Dağlıq Qarabağ həqiqətlərinin işıqlandırılmasında gənclərin sosial mediada çox fəal olduqlarını bildirib.
Gəncə şəhər Gənclər və İdman Baş İdarəsinin rəisi Müşfiq Cəfərov Gəncənin son illər qazandığı statuslardan, gənclərlə bağlı şəhərdə keçirilən layihələrdən danışıb. Bildirib ki, Gəncədə keçirilən yerli və beynəlxalq tədbirlərdə Avropanın müxtəlif ölkələrindən yüzlərlə gənc iştirak edib. Müşfiq Cəfərov tədbir iştirakçılarını fəal olmağa səsləyib.
Gəncə şəhər İcra Hakimiyyətinin baş məsləhətçisi Kənan Məmmədov ölkədə kütləvi informasiya vasitələrinin inkişafı istiqamətində həyata keçirilən mühüm işlərdən danışıb. Medianın ən kütləvi təsir vasitəsi olduğunu bildirən Kənan Məmmədov bu cür layihələrin keçirilməsinin əhəmiyyətini qeyd edib. Kənan Məmmədov Gəncə 2016-cı il Avropa Gənclər Paytaxtı layihələrinin həm yerli, həm də Avropa kanallarında işıqlandırıldığını xüsusi vurğulayıb.
Gənclər üçün Təhsil Mərkəzinin rəhbəri Fəhrəddin Həsənzadə sosial medianın artıq bir həyat tərzinə çevrildiyini bildirib. Respublikada əhalinin 3 milyona yaxını soaial şəbəkələrdən istifadə etdiyini qeyd edən Fəhrəddin Həsənzadə Azərbaycandakı söz və mətbuat azadlığından danışıb.
Bildirək ki, təlimləri İKT mütəxəssisi Cahid İsmayıloğlu, Tribuna İnformasiya Agentliyinin rəhbəri Əlişir Əhəd, politoloq Əhməd Şahidov və Gənclər üçün Təhsil Mərkəzinin rəhbəri Fəhrəddin Həsənzadə keçəcək.
Tədbir iştirakçılarına 2 gün davam edəcək təlimin sonunda sertifikatlar təqdim olunacaq.
.jpg)
