Goranboy Şəhər İcra Hakimiyyəti şəhəri 58-ci kvartal, Şamil Quliyev, Əli Mehdiyev və Elxan Süleymanov küçələrində asfalt-beton örtüyünün əsaslı təmiri üçün 455.448 manat ayırıb.
İH-nin bu məqsədlə may ayının 8-də elan etdiyi tenderin qalibi “Ərdağı” MMC (VÖEN – 2300214111) olub.
Yaxın vaxtlarda tərəflər arasında imzalanacaq satınalma müqaviləsinin şərtlərinə əsasən, adıçəkilən küçələrdə avtomobil yollarının tikintisi təmiri və yerüstü işləri həyata keçirəcək.
Qeyd edək ki, “Ərdağı” MMC 10 dekabr 1992-ci ildə yaradılıb. Nizamnamə kapitalı 10 manat 60 qəpik olan MMC-nin hüquqi ünvanı Gəncə şəhəri “Asfaltzavod”da yerləşir. Şirkətin qanuni təmsilçisi isə Məmmədov Nazim Fuad oğludur.
“Ərdağı” MMC ilə bağlı internet resurslarında geniş araşdırma apardıqda məlum oldu ki, şirkətin adı vergi uçotuna alınmış vergi ödəyiciləri barədə məlumatlarda qeyd olunmayıb.
Həm 2020-ci ildən bu günə qədər Goranboy ŞİH-nin elan etdiyi 5 milyon manata qədər olan tenderlərin aparıcı qaliblərindən biri məhz bu şirkət olub. İş orasındadır ki, bu qədər tender keçirilməsinə baxmayaraq, həm şəhərin, həm də rayondan gedən yolların çoxu hələ də bərbad vəziyyətdədir.
“Ərdağı” MMC ilə daha çox Gəncə, Gədəbəy, Naftalan, Samux, Goranboy və Daşkəsən icra hakimiyyətləri, onların tabeliyindəki qurumlar əməkdaşlıq edir. 2020-2022-ci illərdə sözügedən rayonların yerli icra hakimiyyəti orqanları şirkətlə toplam olaraq 11 milyon 220 min 017 manat 67 qəpik dəyərində sifarişlər verib.
Bunlardan biri Tovuz rayonunda yolların əsaslı təmiri ilə bağlı satınalma müsabiqəsi olub ki, tərəflər arasında bağlanan müqavilənin maliyyə dəyəri 529.971,69 AZN təşkil edib. Digər tender isə Tovuz şəhəri və Bozalqanlı kəndində yolların əsaslı təmiri ilə bağlı olub. Bu lot üzrə icra hakimiyyəti ilə şirkət arasında maliyyə dəyəri 248.501,33 AZN təşkil edən müqavilə bağlanıb.
Rövşən Ziya, Bizim.Media
