Rusiya Dövlət Dumasının sədr müavini Pyotr Tolstoyun ölkələrimiz arasında münasibətlərə kölgə salan açıqlaması ilk növbədə Rusiya dövlətinə və dövlət rəhbərinin imzasına hörmətsizlikdir.
Bunu Milli Məclisin deputatı Bəhruz Məhərrəmov bildirib.
Deputat qeyd edib ki, dövlət suverenliyinin dövlətin ölkə ərazisində yeganə legitim siyasi-hüquqi subyekt olmasını ehtiva edən “daxili”, dövlətin beynəlxalq münasibətlərdə bərabərhüquqlu aktor kimi tanınmasını ehtiva edən “xarici”, daxili işlərə qarışmağın yolverilməzliyində ifadə olunan “vestfal” və dövlətin öz sərhədlərinə nəzarət funksiyasını nəzərdə tutan “qarşılıqlı asılılıq” formaları var: “Dövlətlər arasında yarımçıq və qeyd-şərtlə tanımalara, yaxud diplomatik münasibətlərə yol verilmir. Rusiya Azərbaycanın dövlət suverenliyini bütün aspektlərdən qəbul edir, beynəlxalq münasibətlər sisteminin nüfuzlu üzvlərindən biri kimi Azərbaycanla bərabərhüquqlu və qarşılıqlı faydalı əməkdaşlıq qurur. Azərbaycan heç kimdən, o cümlədən də Rusiyadan asılı deyil. Bütün bunların fonunda Tolstoy dövlət rəsmisi olaraq uğursuz hərbi imperializm kontekstində kasad və sərxoş düşüncə tərzi nümayiş etdirmək və müstəmləkə təfəkkürü dilə gətirməklə əslində ölkəsini beynəlxalq hüququn “Pacta sunt servanda” prinsipinə laqeyd subyekt qismində çətin duruma salır. Əslində Tolstoy kimi hakimiyyət qoluna təsadüfi yol tapmış birinin bəyanatına ciddi yanaşmaya bilərdik, lakin Rusiya Xarici İşlər Nazirliyinin beynəlxalq hüquqa zidd və anlaşılmaz bəyanatı, habelə son zamanlar Rusiya mediasında anti-Azərbaycan ab-havasının geniş vüsət alması, kəskin hücumların artması bizi düşünməyə vadar edir. Yəni bu bəyanatlar Tolstoyun özünün sərxoş “mujik” beyninin məhsulu yox, haradan qaynaqlanması bizim üçün aydın olan ümumi xəttin bir həlqəsidir. Lakin təbii ki, Tolstoy, Zatulin, Milonov kimilərinin bəyanatları Azərbaycan üçün təhdid ola bilməz, lakin bu tip rəsmi açıqlamaların çox yüksək səviyyədə olan dövlətlərarası münasibətlərə mənfi təsiri, xələl gətirməsi qaçılmazdır. Qütbləşmənin dərinləşdiyi və az qala bütün dünya ilə düşmən olduğu bir situasiyada etibarlı cənub qonşusu ilə münasibətlərdə gərginlik ilk növbədə Moskvanın özünün maraqlarına ziddir. Muzdlu, yaxud sifarişli “hücumçular” anlamalıdır ki, bu tip bəyanatlarla Azərbaycana təsir göstərmək, mövqeyimizi zəiflətmək, yaxud digər formada qərarlarımızı dəyişmək mümkünsüzdür. Biz bölgədə maraqlarımızı lazım bildiyimiz formada təmin etməkdə davam edəcəyik”.
