Qoşulmama Hərəkatının Əlaqələndirmə Bürosunun nazirlər görüşünün Bakıda yüksək səviyyədə keçməsi bir daha Azərbaycana və dövlətimizin lideri cənab İlham Əliyevə beynəlxalq aləmdəki nüfuzun və etimadın göstəricidir.
Bunu deputat Şahin İsmayılov deyib
Deputat əlavə edib ki, multilateralizmin əsl müdafiəçisi və BMT-dən sonra ikinci böyük təsisat kimi Qoşulmama Hərəkatı yenidən formalaşan dünya nizamında ciddi rol oynamalı və mövqeyini möhkəmləndirməlidir. “Hərəkat “Bandunq prinsipləri” ətrafında qətiyyətlə dayanmalı, habelə suverenliyin, ərazi bütövlüyünün pozulması və ölkələrin daxili işlərinə müdaxilə hallarına qarşı prinsipial və qətiyyəli mövqe sərgiləməlidir”, – o qeyd edib.
Azərbaycan Prezidenti İlham Əliyevin toplantıdakı çıxışında BMT-nin dünyanın gözləntilərini doğrultmaması və bunun nəticəsində islahatlara zəruri ehtiyacın olması barədə səsləndirdiyi fikirləri şərh edən deputat deyib ki, təsisatın son illərdə dünyanın müxtəlif bölgələrində hökm sürən münaqişələrdə səmərəli fəaliyyət göstərə bilməməsi nəticəsində vəziyyət daha ciddi böhranların yaranmasına yol açıb və bu da öz növbəsində dünyanın təhlükəsizlik arxitekturası ciddi təhdidlərə gətirib çıxarıb: “Beynəlxalq aləmin təhlükəsizlik arxitekturasına cavabdeh olan BMT Təhlükəsizlik Şurası bu işdə aktiv rol oynamaq əvəzinə, bir çox hallarda özləri qlobal təhlükəsizliyə ciddi təhdid yaratmış olurlar. Bu baxımdan BMT Təhlükəsizlik Şurası keçmişin qalığıdır və hazırkı reallıqları əks etdirmir. Ona görə də Təhlükəsizlik Şurasında daha çox ölkənin təmsil olunması və coğrafi baxımdan daha ədalətli olması üçün onun tərkibinin genişləndirilməsi daha yaxşı olardı. Bu da öz növbəsində təşkilatın daha effektiv fəaliyyət göstəməsinə öz töhfəsini verərdi”.
O əlavə edib ki, Azərbaycan Prezidenti ümumiyyətlə toplantıda beynəlxalq aləmi ciddi narahat edən məsələlərə toxunaraq ciddi bəyanatlar verdi:
“Birincisi, son illərdə neokolonializm meyillərinin artması ilə olan narahatlıqdır. Neokolonializm meyllərinin yenidən baş qaldırması çox utanverici bir amildir. Müasir dövrdə müstəmləkəçilik nə qədər çox pis və yolverilməz olsa da, təəssüflər olsun ki, özlərini dünyada beynəlxalq hüququn, qanunun aliliyinin və demokratiyanın keşikçisi hesab edən ölkələr bu siyasəti davam etdirməkdədir. Müstəmləkəçilik siyasətini yürüdən ölkələrdən biri də Fransadır. Fransanın yürütdüyü müstəmləkəçilik, neokolonializm siyasəti qlobal sülhə və sabitliyə ciddi təhlükələr yaratmaqdadır. Məhz Fransanın neokolonialist, “Orientalizm” siyasəti nətisəsində Cənubi Qafqazda sülhü təmin etmək mümkün deyil. Belə ki, Fransa prezidenti Emanuel Makronun Cənubi Qafqazdakı geosiyasi maraqlar uğrundakı mübarizəsi üçün ermənilərdən daha çox “erməniçilik” edir, Ermənistana təzyiqlər edərək sülhə mane olur. Fransanın bu siyasətinin əsas mahiyyəti ermənilərə dəstək vermək yox, Ermənistandan və ermənilərdən bir alət kimi istifadə edərək bölgədə müstəmləkəçilik siyasətini və digər maraqlarını təmin etməkdir. Bu alınmayacağı təqdirdə isə bölgədə irredensit, işğalaçılıq meylləri təşviq etməklə sabitliyi pozub bölgədə gərginliyin davam etməsinə nail olmaq istəyir.
Digər tərəfdən Fransa dünyada irqçiliyi, rasizmi, islamafobiyanı dəstəkləyib bunu körükləyən ölkələrdəndir. Amma unudur ki, bu müstəmləkəçilik, irqçilik, rasizm, islamafobiya nəticədə bir bumeranq effekti verəcək və Fransa dövləti, fransız xalqı bunun ağır bədəlini ödəməli olacaq. Elə son günlərdə Fransada polisin 17 yaşlı gənci qətlə yetirməsindən sonra baş verən iğtişaşlar bunun bariz nümunəsidir. İndi Fransa öz “əkdiyi” məhsulun bəhrəsini görməkdədir.
Toplantıda ikinci ciddi məqam Ermənistanın kapitulyasiya aktına imza atmasına baxmayaraq hələ də sülh danışıqlarından manipulyasiya etməsi ilə bağlıdır. Cənab Prezident Ermənistanı kapitulyasiya bəyanatında üzərinə götürdüyü, xüsusən də rus hərbi kontingentinin müvəqqəti nəzarətində olan ərazilərdə erməni hərbi birləşmələrin tərksilah edilməsi, Zəngəzur dəhlizinin açılması ilə bağlı üzərinə götürdüyü öhdəlikləri yerinə yetirməməkdə ittiham edib. Bununla cənab Prezident həm Ermənistana, həm də onun havadarlarına ciddi mesaj verdi ki, əgər İrəvan sülh istiqamətində ciddi addım atmazsa, o zaman sərt sülhəməcburetmə hüququndan istifadə edə bilər və bu hüququ özündə saxlayır.
Prezidentin toxunduğu növbəti ciddi problem Ermənistanın işğalı nəticəsində Azərbaycan ərazilərinin dünyada minalarla ən çox çirkləndirilmiş on ölkə sırasında olması ilə bağlı qaldırdığı məsələdir. 2020-ci ilin noyabrında Vətən müharibəsi başa çatdıqdan sonra mina partlayışı nəticəsində təxminən 300 azərbaycanlı həlak olub və ya ağır yaralanıb. Mina partlayışı Ermənistanın törətdiyi hərbi cinayətlərin və mina terrorunun uzun siyahısının davamıdır. Bu da işğaldan azad olunmuş ərazilərdən məcburi köçkün düşmüş insanların öz ata yurdlarına dönüşünü əngəlləyir.
Prezidenti bəyan etdi ki, bütün bu çətinliklərə baxmayaraq, Azərbaycan mina probleminin ardan qalıdılması istiqamətində ciddi işlər görməkdədir. Prezidentin bəyan etdiyi kimi, əgər Ermənistan həqiqətən də regionda çoxdan gözlənilən sülhdə maraqlıdırsa, onda onun silahlı qüvvələri Azərbaycanın Qarabağ bölgəsindən tamamilə çıxmalı, Zəngəzur dəhlizinin açılmasına mane olmamalıdır”.