Müstəqil Azərbaycan dövlətinin qurucusu Heydər Əliyevin anadan olmasının 100-cü ildönümü ilə əlaqədar cənab Prezident İlham Əliyev tərəfindən elan olunan “Heydər Əliyev İli” çərçivəsində NAYORA-nın təşkilatçılığı ilə bir sıra tədbirlər keçirilib. 2023-cü il üçün Gənclər paytaxtı Mingəçevir şəhərində keçirilən ARGTMŞ üzvlərinin Məclisi bu tədbirlərdən biridir. Proqram çərçivəsində məclisdə açılış nitqi ilə çıxış edən NAYORA-nın sədri Azər Əliyev öncəliklə əsası Ulu Öndər Heydər Əliyev tərəfindən qoyulan gənclər siyasəti haqqında məlumat verərək bu gündə cənab Prezident İlham Əliyevin rəhbərliyi ilə uğurla davam etdirildiyini xüsusilə vurğulamışdır. Qeyd edək ki, məclisin yekun qərarına uyğun olaraq NAYORA üzvlərinin sayı 150-ə çatmışdır.
Məclis çərçivəsində Gənclər və İdman Nazirliyinin Gənclərlə iş şöbəsinin müdiri Fuad Babayevin iştirakı ilə “Dövlət Gənclər Siyasətinin həyata keçirilməsində Heydər Əliyev ideologiyası və irsi” mövzusunda görüş keçirilib. Məclisin davamı olaraq İdarə Heyətimizin üzvləri Nail Şükürov və Dinara Bayramlı tərəfindən “Gənclər təşkilatlarında səmərəli idarəetmə: mövcud imkanlar və çətinliklər”, Sağlam Düşüncə Gənclər Təşkilatının həmtəsisçisi Ramiz Əliyev və təşkilatın sədri Sevinc Qasımova tərəfindən isə “Erasmus+Youth və European Solidarity Corps mövzularında vörkşoplar baş tutub. Həmçinin Heydər Əliyev Mərkəzinə və Mingəçevir Gənclər Evinə infotur təşkil edilmişdir.
Məlumdur ki, Ulu Öndərin hakimiyyəti dövründə Azərbaycanda bütün sahələrdə olduğu kimi idmanın və bədən tərbiyəsinin inkişafına qayğısı bu sahədə yüksəlişin əsasını qoyub. Bu məqamlar nəzərə alınaraq Milli Şura tərəfindən gənclər təşkilatları arasında mini-futbol çempionatına strart verilmişdir. Yarış ümumilikdə 16 gənclər təşkilatının iştirakı ilə həyata keçirilib.
Qeyd edək ki, Gənclər və İdman Nazirliyi, Gənclər Fondunun dəstəyi ilə baş tutan silsilə tədbirlər çərçivəsində növbəti fəaliyyət olaraq gənclər təşkilatları arasında intellektual yarış keçirilib. 8 gənclər təşkilatının iştirak etdiyi oyunda komandalar Heydər Əliyev irsi, tarix, İkinci Qarabağ müharibəsi, ümumi dünyagörüşü ilə bağlı suallara cavab tapmağa çalışıblar. İki mərhələdən ibarət olan yarışda Böyük Qayıdış Gənclər Təşkilatı birinci yerə çıxaraq kubokla mükafatlandırılıb. Cavan Gənclər Hərəkatı və Azərbaycan Gənc Müəllimlər Assosiasiyası İctimai Birliyi müvafiq olaraq ikinci və üçüncü yerləri öz aralarında bölüblər.
Həmçinin digər bir fəaliyyət olaraq gənclər təşkilatlarının nümayəndələrinin qanvermə aksiyası keçirilib. Aksiyada 30-dan çox gənclər təşkilatının rəhbər və nümayəndəsi iştirak edib.
Xüsusi vurğulayaq ki, 10 May tarixində yüzlərlə gəncin iştirakı ilə Fəxri Xiyabana ziyarət təşkil olunmuş, Ulu Öndərin məzarı önünə gül dəstələri qoyulmuşdur.
Azərbaycan xalqının tarixində böyük xilaskar kimi fəxrlə söz açdığımız, davamlı yüksəliş yolunda inamla irəliləyən müasir Azərbaycanın qurucusu olan Ulu Öndər Heydər Əliyevin xatirəsini daima hörmət və şərəf hissi ilə anır, xatirəsini uca tutur və onun şah əsəri olan güclü Azərbaycanın gəncləri olduğumuz üçün qürur duyuruq.
